مسرحية السيد المدير العام

[فراس السوري]

الشخصيات :
جمعة : مدير عام كان مراسلاً
أبو ماضي : المدير العام السابق
سوزان : سكرتيرة
أبو اسماعيل: مدير ادارة
أبو عدنان : مدير تخطيط
حاتم : مدير علاقات عامة ، عريف حفل
خالد : مترجم
نادية : مديرة شؤون المرأة
أبو زياد : عضو المجلس الأعلى
حامد : مراسل
عادل : صحفي
فدوى: موظفة شابة
بهيجة : زوجة جمعة
موظف : مدير المشروعات
مندوب البنك
الفصل الأول
( تفتح الستارة علة مكتب المدير العام مجهز بأحدث وسائل الاتصال الحديثة : تيلفون ، فاكس ، انترنت ، دش ، مكتب فاخر مع حرف T كنب ، سجاد ، تحف ، ووضع على المكتب لوحة كتب عليها " المدير العام " مع رفع الستارة ، يبدو الغبار بفعل قيام المراسل بتنفيض المكتب وهو يحمل أداة التنفيض )
المراسل : واللة تقول ان حضرة المدير العام صارله شنة غايب عن المؤسسة مش كلهم يومين بالعدد أخ ايش هالغبرة كيف لو اني بنفضهاش كل يوم ..أه يا عمي هادي الغبرة من كثرة الشغل
( يواصل التنفيض والترتيب يزيل الأواني والأدوات ، يرفع الشرشف من على الطاولة ، ثم ينفض ، ويقوم باعادة ترتيب الأدوات الموضوعة على الطاولة ، يتأملها ، ثم يرفع سيجاراً ويشمه ثم يبدأ في تنفيخه وهو غير مشتعل )
المراسل : عز يابا بس لناس وناس ، ( ثم يدور حول الكرسي ) ، وبعدين في هالغبرة آه يا عمي مانت طول اليوم وفود طالعة ووفود نازلة ، مش ملحق تستقبل شخصيات ومسؤولين ، إشي عرب وإشي اجانب ، والموظفين طول نهارهم بشربوا شاي وقهوة وبتثاوبوا وبيحلموا حدا يزورهم وكل ما بزهقو برجعوا بقروا جرايد ، مساكين وكل شوية بيتطلعوا في الساعة ، غلابة ويرجعوا يقروا جرايد لحد ما يطقوا من الزهق ، وآخر الشهر يروحوا لمدير الادارة ، بدهم ساعات اضافية ، وبدل طبيعة عمل
( يواصل الترتيب والحديث ) الله وكيل .. أبو اسماعيل لا مخلي خبر عن مطلقة ولا معلقة .. ولا عن وفيات ولا تهاني ، من شره ، وأول ما بفتح على الكلمات المتقاطعة ، ويلاقي الكلمة الضايعة ، قال الكلمة الضايعة ، مانا لو سألت أي ولد صغير في الشارع راح يعرفها !!
( يتأمل المكتب ويتحرك باتجاهه ، ثم يدور خول الحرف T ويكمل حديثه ) أي على الحرام من راسي ، أنه مديرنا العام أكثر مدير عام بيعمل اجتماعات في الدنيا ، وعلى هالاجتماعات اللي بيعملها ، المفروض انه ما ضلت مشكله الاوانحلت ، يالله كله سداد ودين ، وهيهم النشامى بيسددوا اياها مهمات ، واليوم قال بيرجع ، ان شالله رجعة سبع عاد ..
( يتوقف قليلاً تم يواصل ) بس انا ماقهرني غير هالأجهزة الي حواليه ..
( يتطلع الى الأزرار ويقول ) مية زر وزر ، اكبس وشبيك لبيك .. كيف بيعرفهم من بعض ؟ ما هو بيضل يلعب عليهم باصابيعه زي البربنط
( يقوم جمعة بتجربة الأزرار فيجيئه صوت مدير الادارة عبر الانتركوم)
مدير الإدارة : نعم ياسيادة المدير العام ! صباح الخير مالك مبكر اليوم ، الحمد الله على السلامة احنا في الخدمة
المراسل : ( يرتبك جمعة قليلاً ، لا يدري ماذا يفعل ، كما بالحديث يتردد ، ثم يقوم بتقليد المدير العام )
قول للزفت الأستاذ جمعة ، يجيبلي فنجان قهوه
مدير الإدارة : حاضر .. حاضر..
(ثم يسمع صوت مدير الإدارة عالياً وممدوداً : جمعة .. جمعة ..)
( جمعة يخرج من غرفة المدير العام سريعاً يجيب على مدير الإدارة )
الإضاءة تنتقل الى مكتب الموظفين
مدير الإدارة : يابني آدم ست آلاف مرة صرت ، قايلك من حد ما يخش المدير العام ، بتلحقه بفنجان القهوة زي الريح.. يالله طير
(جمعة يخرج غاضباً ويبرطم ببعض الألفاظ غير المفهومة ويسب مدير الادارة في سره ثم يذهب لغرفة المدير العام يضغط علىنفس الأزرار التي ضغط عليها سابقاً فيأتيه صوت مدير الادارة )
مدير الادارة : نعم يا استاذ فنجان القهوة ما وصلش
جمعة ( مقلداً صوت المدير العام ): لأ وصل بس يا محترم ( باستخفاف ) مش حفي لساني ، وانا اقول اول ما اخش المؤسسة بدي اشوف الورد عالمكتب ؟ ليش ما صرفتش حق الورد تبع امبارح ؟ أي هو احنا بنجيب الورد علشان نشمة ؟ يالله .. روح .. مع السلامة ..
(ويغلق الخط كأنه يغلق في وجهه متعمداً ، جمعة يجلس على مكتب المدير العام ، يدور به يميناً وشمالاً يتأمل المكتب والكرسي والأجهزة يسحب سيجاراً ، ويبدأ حالة التقمص ، يرفع السماعة دون ان يفتح الخط )
جمعة : الو .. ايوة .. نعم .. احنا الصحيح ( ويعدل جلسته ) قايمين يمهمتنا على اكمل وجه ، بس الظروف صعبة ، والميزانيات ، يعني الحالة مش ولا بد .. المزبوط يعني الوضع كله ماكل هوا هأ هأ هأ ..
***( يضع السماعة ثم يفتح جهاز التلفزيون ، يشاهد بشغف ، ثم يغير المحطات تباعاً ، يتوقف عند واحدة )
جمعة : يا سلام ، ايش هالمحطة ؟ والله الواحد بيقضي يومه يتسلى حتى كل ساعات الدوام ما بتكفي
***( يقوم باشعال السيجار ثم يضغط على الانتركوم )
جمعة : وينه جمعة ؟ كباية شاي زي الهوا ( ينتبه ) ولا بلاش جمعه ابعتلي حامد
***( يضع السماعة ثم يتابع جلوسه على المكتب )

***( تنتقل الاضاءة الى قاعة الموظفين ، مدير العلاقات العامة ( حاتم ) ، يكون عند مدير الادارة ، يوقع على دوامه ، بعد الإجازة ينتبه الى ان المدير العام قد عاد فيبادر )
حاتم : المدير العام هان ؟ خليني ادخل لعنده ، أحطه في صورة المناسبات اللي لازم يحضرها أو يشارك فيها عشان اجندة مواعيده
***(تعود الكاميرا الى جمعة ، مازال يتفرج على التلفزيون يتنقل بالرموت كنترول من محطة الى اخرى فيما يبدوا الاندهاش على وجهه )
جمعة : هي هي .. له له .. ولعت .. علناً علناً يا عالم
(يصل حاتم فيقرع الباب )
جمعة : ادخل (من الداخل دون تفكير )
***(حاتم يفتح الباب ويدخل فيجد جمعة يجلس على مكتب المدير العام وفي هيأته فيعتقد بأنه صار المدير العام )
حاتم : الف مبروك يا استاذ ، أنا والله من زمان كان قلبي حاسس انه في اشي غلط في المؤسسة والحمد لله تصحح اليوم .. والله هادي احلى مفاجأه ، انا مكنتش متصور اني اخش المكتب والاقيه منور بحضرتك بس كيف هالمناسبة بتمر وما بنقوم بالواجب ؟ لازم نعلن ونهني ونحتفل ، احنا في هادا اليوم الي تصير حضرتك مدير عام المؤسسة .
***( تدخل السكرتيرة تحمل اوراقاً ، تسمع نهاية حديث حاتم ترى المشهد فتفاجأ وتقف تراقب الوضع ، ثم تتقدم من جمعه فيما يدخل المراسل حامد بكأس الشاي )
جمعة : يأخ حاتم شكراً على هالاطراء ، بس الموضوع ..
حاتم ( يقاطعه ) : لا شكر على واجب يا استاذ ، انا كنت جاي عشان مواعيد الاسبوع ، ايش رأيك نخليها الوقت تاني شايف الوقت مش مناسب
جمعة : مزبوط .. خليها مرة ثانية
**(يخرج حاتم وتتقدم السكرتيرة من جمعه )
السكرتيرة : الف مبروك يا استاذ ( بأدب ) ان شاء الله منها للأحسن منها ، انا الصحيح جايبة بريد اليوم للأستاذ ( ثم تتدارك ) قصدي لحضرتك ..
جمعة : بلا حضرتك بلا استاذ تعالي جنبي هان ، قوليلي ايش فيها هاالاوراق ..
**(ثم ينتبه الى حامد الذي يبدوا متفاجئاً هو الأخر )
جمعة : هات كباية الشاي ويلا مع السلامة
**(يخرج المراسل بعد ان يضع كأس الشاي امامه على المكتب )
السكرتيرة : بس مش يا استاذ تطلع عليها الأول ؟
جمعة وهو يرتشف من الشاي : ايش هالشاي الله يرحم الي كنا بنعمله
**( تتطلع فيه السكرتيرة باستغراب )
جمعة : قصدي الي كنا بنشربه ، ما دقيش .. وهادي الأوراق ، ايش فيها ؟بس انت قوليلي ايش المطلوب ؟ والله اقولك ردي عليها بنفسك مانت هان الكل في الكل ، انت اكتبي الي بدك اياه ، انت اكتبي الي بدك اياه وانا بوقع .. ولما تخلصي ، بنكمل كلامنا ، ايش رأيك ؟
السكرتيرة : زي ما تشوف يا استاذ
وتغادر وهي في حالة مفاجأة .
***( يدور حامد يخبر الجميع بأن جمعة قد أصبح المدير العام ، يجري قليل من اللغط بين الموظفين ، ثم يبدأوم في الحضور الى مكتبه ليباركوا له . يتجمع الموظفون حول المكتب ، حيث يجلس جمعة الذي يغطس بدوره في مكتبه ( خجلاً وخوفاً ) في هذه الأثناء يكون قد تم تبديل ملابسه تحت المكتب وتغير مكياجه وفي لحظات يظهر جمعة بلباس جديد فاخر ، بدلة سموكن سوداء وحذاء جديد ، وسيجار ، ويغني أغنية فيما يتحول الموظفين الى كورس
انت (اسمع يا كبير )
انت ( اسمع يا صغير )
ارخيلي دانك.. فتح لي عينك
على اللي بيصير
كله يفتح دياته .. حنوزع من كراماته
اشي كتير واشي قليل
حتى على الي ماتو
انت من انهي حموله
ولا امك مسؤولة
ورح تتفتح لك الابواب
من انت والكفولة
حنعبي الهوا بقزايز
آيز آيز آيز
ونوزع ع ع الكل برايز
آيز آيز آيز
ومهو كل شيء ممكن وجايز
في نهاية الأغنية يصرخ جمعة قائلاً : اجتماع
***(يجلس على مكتبه فيما يجلس الموظفون أمامه)
جمعة : ياجماعة ، بدنا نقعد قعدة عرب ، ونحكي على المفتشر ، أنا عارفكوا واحد واحد ( ولا نسيتوا )
هالله هالله ع الجد والجد هالله عليه ، لازم كلنا نكون ايد واحدة ، كباية الشاي نشربها مع بعض .. وكل واحد على شغله .. على شغله يالله ، اتفضلوا ، من غير مطرود يعني ..
*****
***(ابو عدنان يدخل لعند ابو اسماعيل ، يجلس امامه) ويقول :
معقول يا ناس ؟ المراسل يصير مدير عام ؟
ابو اسماعيل : لا تستغرب يا صاحبي ولا على بالك ، كل شي بصير زي الكذب
ابو عدنان : بيصير .. نعم بيصير .. بس هيك من غير مقدمات وفي لحظة من القفة لدانها ؟ والله اشي بيجنن
ابو اسماعيل : اسمع ، بلا قفة بلا دانها ، قوم نطلع لعنده نحطة بصورة الشغل .. ونشرب فنجان القهوة احسن
ابو عدنان : شفت بالله ( وكأنه لا يسمع صاحبه ويتابع استغرابه ) وانا اللي من الصبح بقولك قوم نشوف المدير العام بكون رجع من السفر وبنكون اول ناس بيسلموا عليه ، واتريه- الأخ جمعة- قاعد مطرحه.
ابو اسماعيل : يا ابو عدنان ، بلا كثر غلبه ، قوم طاوعني نروح لفوق ويعني بالله احنا ايش بتفرق معانا ؟ اللي بيتجوز امي بقوله يا عمي ..
ابو عدنان : بس هيك في لحظة ؟ يا زلمة اكيد في سوء تفاهم في الموضوع !
ابو اسماعيل : لا سوء تفاهم ولا يحزنون ، وتلاقيه هالقيت قاعد يخاطب المسؤولين اللي داعمينه واللي وصلوه لفوق ، وبيوقع المراسلات ، قايم بدوره على خير ما يرام
ابو عدنان : ( بدا انه اقتنع على مضض ) يالله قوم ، ندعبس ونتحقق ونشوف ايش المشكلة .
ابو اسماعيل : يالله نقوم بالواجب
ابو عدنان ( موافقا) : يالله نقوم بالواجب
****
***(عند السكرتيرة في مكتبها ، يوجد شاب صحفي ينتظر ، يرن هاتف السكرتيرة ، ترفع السماعة وتخفض صوتها )
السكرتيرة : نعم حضرة المدير العام ، في أخ صحفي طالب مقابلتك
جمعة : صحفي ولا صحفية ؟( صمت ) ذكر يعني ؟ خليه يستنى شوي
***( لا يكون مشغولاً بشيء لكنه يواصل اللعب بالرموت كنترول ويتفرج على مباراة كرة قدم ، يتنقل معها يضغط على زر )
جمعة : ابعتيلي خالد بسرعة
***(ويتابع المباراة الى ان يدخل عليه خالد فيبادره )
تعال يا خالد ، ترجم إلي ايش بقول المعلق ، مش لا اهلي ولا زمالك ، يالله ولا البلاش بتفرج ع الأجانب ، بركي بنروح بمهمة كروية ع بلاد بره
***( تفتح السكرتيرة الانتركوم تذكره بوجود الصحفي )
جمعة : ماشي الحال خليه يدخل ، بس ما يطولش ، ربع ساعة بس ، الاستراحة بين الشوطين
السكرتيرة تقاطعه باستغراب : نعم يا استاذ
جمعة : لا ولا اشي ، اسمعي ما تنسيش بكرة تعلميني على لعبة الشدة الي بتلعبيها ع الكمبيوتر مبين عليها حلوة
السكرتيرة : الصحفي من زمان بستنه
جمعة : آه .. طيب ، خليه يتفضل
***(ثم يتناول صحيفة كأنه يقرأ ثم يتناول نظارات يضعها على عينيه يقرأ في حظ اليوم الذي يقوله له " تلتقي اليوم شخصاً مهماً يبدأ اسمه بحرف الجيم ، يدخل الصحفي ، فيتطلع اليه من وراء النظارة ، ويسأله مباشرة)
جمعة : اسمك جمال ؟
يتفاجأ الصحفي : لأ
:جابر
: لأ
: جون
: اسمي عادل
جمعة ضاحكاً : اهلاً تفضل يا جي عادل !
ويتابع : طيب ايش برجك ؟ ليكون الحمل ؟
عادل : مزبوط
جمعة : آا يعني هذا الحظ الك بدك تقابل شخصية مهمة يبدأ اسمها بحرف الجيم
(ثم سعيد باكتشافه ): هذا انا جمعة ... شخصية مهمة يالله تفضل واستفيد من حظك اليوم
**( ينتبه الى ان الصحفي مازال واقفاً ) :
اتفض اقعد يا جي عادل
**((يجلس الصحفي ومعه كاسيت وكاميرا )
جمعة : انا جمعة ابن خميس الهبيان ، عمري 40 سنه متزوج من بهيجة بنت خديجة الجعار ، عندي ست اولاد واربع بنات، بحب الفوطبول وطبيخ الفاصوليا الفاصوليا مع لحمة الخروف البلدي ، الفاصوليا البلدية الي حبتها صغيرة ، اوع يضحكوا عليك ويبعوك من الاسرائيلية ، وبتتفرج ع( الدش ) واليوم صرت مدير عام هيك خبط لزق ما هو انا برج الحمل .. وحظي وحظك ضارب اليوم بس لو كنت بعرف كان عبيت اللوتو وكان صرنا فوق الريح ..
***(يبدي الصحفي استغرابه) :
يتابع جمعة : شاي ولاقهوة يا اخ ؟
الصحفي : مفيش لزوم
جمعة : طيب فستق ، بزر ، قضامة ، يالله يادرة بلدي " وكأنه يبيع "
( ويضيف) : لا موجود ، المالية لسة ما عملتش جردة النثريات ، واحنا في اول السنة ، وزر بيجي حامد شبيك لبيك
***(يضغط على الزر تدخل السكرتيرة)
جمعة : شوية مكسرات لو سمحت
بعد خروج السكرتيرة
الصحفي : خلينا نبدأ الحوار ، وعشان الوقت ( يتطلع في ساعته ) ربع ساعة بس ، وكأنه يذكره
جمعه : اه معلوم ، بتحب تسأل عن اشي معين ولا انادي حاتم يسألك وتجاوبه هأهأ ؟؟
الصحفي : لأ ، الصحيح ، إحنا بنعمل تقرير عن الإنجازات خلال السنة ، وبدنا مؤسستكوا تعطينا صورة عن أعمالها
***(تدخل السكرتيرة تضع بعض المكسرات على الطاولة ويبدأ جمعة بأكل فزدق حلبي ويتكلم)
جمعة : احنا الصحيح ما صورنهاش لأنه ماكنة التصوير عطلانه
الصحفي مصححاً لما اعتقده جمعة :
بقصد تعطيني فكرة ، ملخص او موجز ..
جمعة : موجز زي تبع الأخبار يعني ، يالله كله صحافة بصحافة
الصحفي : او تقرير عن العمل
جمعة ( كأنه يفهم اخيراً) : آه يعني بدك ايش اشتغلوا الموظفين طول السنة
الصحفي ( مؤكداً) : طول السنة
***( جمعة يضغط على الزر ، تظهر السكرتيرة يطلب منها الملف الذي يتضمن تقرير العمل )
جمعة ( يداعب الصحفي ) : وايش اخبار الجريدة والتلفزيون
الصحفي يرد اليه السؤال : انت ايش رأيك ؟
جمعة : انا بموت عالفزدق الحلبي خصوصاً لما يكون طازة
جمعة يعتد كالمسؤول : هو يعني فيه تطور والأخبار يعني أول بأول ، والصحافي مغطية والتلفزيون ما شالله بالألوان ، ع الهوا وبسجل برامج كل الفضائيات وأحلى المسلسلات عشان يوفر علينا والناس مش عاجبها ، من وين بدهم يجيبولكوا يعني ؟
***( تقع حبة فزدق حلبي على الأرض فينزل جمعة للبحث عنها واثناء ذلك يتابع كلامه مع الصحفي )
الصحفي: والاذاعة
جمعة : هنا لندن ، صوت العرب من القاهرة
الصحفي : لا اذاعتنا
جمعة : انت بس تعال كل فترة وفترة وانا بهتم بأمرك يعني اذا بدك تتوظف ولا مش عاجبك الراتب
***( تدخل السكرتيرة )
: هادا هو الملف
جمعة : يالله يا خال سجل
يبدأ الصحفي بالتسجيل
جمعة ( يتابع ): بمين نبدأ ؟ بالاستاذ جميل ، ولا الاستاذ عمر ؟
الصحفي : حسب الدوائر
جمعة : آه الترجمة .. لسة قبل شوي الأخ خالد ترجملي تعليق كروي
الصحفي : يستمع ويسجل
جمعة : السكرتارية ، حل 271 مربع كلمات متقاطعة ، وانجاز 23 لعبة شدة ع الكمبيوتر ، دائرة المرأة ( ويتتبع الملف )27 كنزة صوف ، 15 ثوب فلاحي ، و 29 مريلة أطفال ... الادارة صرف 357 فاتورة بنزين و 764 فاتورة مطعم و 25 مهمة للخارج .. 63 انذار و 450 يوم اجازة ، وخصم 47 يوم تخلف عن الدوام ( يعلق قائلاً ) اه يا ولاد الملعونة ، خصمتوا علي نصهم .
ثم يتابع : وصرف 842 ساعة عمل اضافي ( انا ولا ساعة منهم )
الصحفي مستغرباً : يا حضرة المدير العام
جمعة : ايش ما بدك نكمل ؟
الصحفي : لأ.. انا بحكي عن الانجازات .. الانجازات الملموسة
جمعة : ايش يعني ؟ مش عاجبك التقرير ؟ هاتي يا سوزان ( ويضغط الزر) ورقة وقلم .. خلي الأخ يكتب الي هو عايزة
الصحفي ينهض : استاذ جمعة ..شكراً
جمعة : وين ، لسة تقرير دائرة الضيافة ، تبعتي سابقاً 7856 كاسة شاي + 3622 فنجان قهوة ..
الصحفي يغادر
جمعة يتابع : والسواقين والناس والبلد
ثم يقول : اما صحافة .. أي البلد ع باب الله من قليل ؟
***

*** (ابو عدنان وابو اسماعيل يدخلان على جمعة فيجدانه جالساً على المكتب بزهو )
ابو عدنان : مرحبا يا جمعة ، قصد يا استاذ جمعة
ابو اسماعيل : قال صحيح ..
*** (ابو عدنان كانه يأخذ الكلام من زميله )
: مش كنت تقول يا زلمة ، يعني هو احنا كنا نكره ؟
ابو اسماعيل : بس عشان الواجب يعني ..
ابو عدنان : آه مش واجب برضه نقوم بالواجب ؟
جمعة : طيب خلص .. يعني كان لازم اشاوركوا ولا ايش ؟ هو الموضوع كله صار صدفة .
ابو عدنان : صدفة ؟ كيف يعني ؟
جمعة ( يتدارك ) : قصدي صار بسرعة ، من غير تخطيط ..
ابو اسماعيل : زي كل اشي
ابو عدنان : هيك احسن ، لو كان فيها تخطيط ..
***(عدنان يمد يده يريد ان يأخذ فزدق حلبي جمعة يضربه على يده)
جمعة ( يقاطعه ): بيكفي عاد عملتوا لي اياها حدوته وحكاية تفضلوا اقعدوا .. تشربوا شاي ولا قهوة ؟
***(يجلسان فيما يدق على الجرس الداخلي يطلب لهما شاي وقهوة ثم يسأل)
: ايش اخبار المؤسسة ؟
ابو اسماعيل : بالمناسبة لازم نعمل احتفال
(يمد يده ليأخذ فزدق يضربه على يده)
جمعة : بلا احتفالات ، بلا مهرجانات ، هي انطلاقة يعني ولاتأسيس ؟
ابو عدنان : انت ليش مصغر حالك ؟ والله اهم من انطلاقة واحسن من تأسيس .
ابو اسماعيل : ليش لأ يمد يده على الفزدق ، والموظفين الصحيح مبسوطين ومفكرين ينزلوا اعلان في الجريدة
جمعة متفاجئاً : اعلان (ويضربه على يده) ؟ جريدة ؟
ابو عدنان : ليش لأ ، عشان الناس تعرف .
ابو اسماعيل : آه عشان المسؤولين يتصلوا فيك ويخاطبوك رسمياً ..( كأنه يتذكر شيئاً) .. بالمناسبة ، ومن غير مؤاخذة لو حضرتك تتفضل وتبعت للإدارة صورة من الكتاب؟
جمعة : كتاب ؟ أي كتاب ؟
ابو اسماعيل : كتاب التعيين
جمعة : كتاب التعيين ؟
ابو اسماعيل : ايش هو ما وصلش ؟
جمعة : لأ .. لأ موجود
***(ثم يدس يده في درج المكتب فيخرج أي ورقة)
***( ابو اسماعيل يحاول ان يتناولها)
جمعة : لأ بعدين ببعتلك صورة عنها

***(يستأذنان ، جمعه يحثهما على البقاء ، وهو يقف ، ويفتح الباب طيب قزقزوا فزدق فيعودان )
: لسة بدري يا اخوان يمد يده ويسلم عليهم وكأنه يطردهم ، على العموم سلمولي على الزملاء الموظفين ، وانا هيك ان شاء الله نص ساعة زمان وبكون عندهم ، يعني جولة ميدانية ، بس هه ديروا بالكوا .. خلوها زياره مفاجئة .. صحيح والشاي والفزدق
جمعة : بعدين بنشرب شاي وبناكل حلو كمان
***(جمعة يعود الى مكتبه يتأمل الورقة ، يفكر ، ثم يخرج من الدرج خاتماً ويكتب :
يعين السيد جمعة ابن خميس الهيبان مديراً عاماً للمؤسسة العامة اعتباراً من امس قراراً وجاهياً غير قابل للنقض مع موافقة العائلتين بالرفاق والتراضي بينهما والله من وراء القصد .. قبلتك زوجة .. قبلتك فحلاً ، وعليه اوقع ، ثم يوقع ويختم الخاتم ، ثم يعيده الى الدرج ويبدأ في اخراج الاوراق )
جمعة : طلب تعيين سكرتيرة .. غادة ابو ماضي .. آه يا عمي هادي بتكون من القرايب .. مع الموافقة طبعاً .. هادا .. كمان طلب تعيين دكتوراه في التخطيط والادارة .. من وقتيش .. 6 اشهر .. يؤجل .. طبعاً بلزمش .. ويش هادا .. طلب مساعدة .. عشرين الف .. آه مانتوا ياحرام ناقصين مصاري ..( يتابع التفتيش ) .. فاتورة مهمة للخارج ، موقعة للصرف .. وقبل ما ترجع ، طبعاً .. صحتين يابا ، ماهو المال السايب ..
***(يرن الجرس الداخلي )
السكرتيرة : استاذ في آنسة ع الخط طالبه حضرتك
جمعة (بفرح): قلتي آنسة ، مش آنسة يعني ..
السكرتيرة : ( تؤكد) نعم آنسة أسمها فدوى مصرة تحكي معك
جمعة : هي موجودة
السكرتيرة : لأ ع التلفون ، بس بدها موعد
جمعة : اعطيني اياها ، بكلمها ، وبحدد موعد ، بس اوعي تقولي لحدا
***(جمعة يعدل من هيبته ويرتب شعره)
الو ، نعم .. أنا حضرتي .. الاستاذ المدير العام ، مين حضرتك
: فدوى
:يا سلام اسم بيجنن ، واكيد انت حلوة زي اسمك .. وقديش عمرك يا فدوى
: 17 سنة
:عال العال.. متزوجة يا فدوى
: لا
: مخطوبة
:لا
: محبوبة .. كمان لا ، وقت ما بدك تعالي يا فدوى هان ولا في البيت ؟ هان .. هان يالله بتحضري معنا الحفلة كمان ..
: دكتور
: لا شكر على واجب
ثم يغلق الخط ويتساءل :
دكتور .. وكمان دكتور ؟ يالله كلها سفرة لبرة وبنعمل منها مهمة للخارج بنروح على روسيا ولا اوكرانيا .. زي ما عمل هضاك الواحد وبنرجع بزيطة وزمبليطة
تدخل السكرتيرة ببعض الاوراق
يبادرها بالقول : تعالي هان قربي ، مالك مستحية
سوزان : في اشي يا استاذ
ينتبه فيقول : ايش رايك تعلميني ع الكمبيوتر ؟
سوزان بخبث : ع الكمبيوتر ولا ع اشي تاني ؟
جمعة : ايش رايك يا سوزي ،لو تقربي مكتبك ، تيجي عندي هان ، بلاش تضلك رايحة جاية .. يعني عشان المشوار بعيد ..
سوزان بدلع : انت قلقان علي والا
جمعة : قلقان و (والا) .. ايش رايك نزيح هالديكور ، ولا نقربه ، ولا حتى ندخل مكتبك في غرفتي ؟
سوزان ضاحكة : ايش بدي اصير مدير عام كمان ؟
جمعة مستاء : ايش مدير عام ؟ لالا بلاش خلي مكتبك غاد ، بس انت تعالي هان
سوزان : يا استاذ احنا في الدور مش ورا الستاير
جمعة : ويعني هو احنا عنا اسرار ؟ والله ما نفسي الا ونعمل مسرحية ، ونفضح فيها بلاوي الفنانين ..
تضع الممثلة اوراقها وتخرج وهي تحاول اخفاء ضحكتها
اسدال الستارة
الفصل الثاني
***( تفتح الستارة على الموظفين جميعاً وهم مجتمعون ينتظرون المدير العام وقد زينوا المكان حتى اذا حضر جمعة بادروه بالغناء )
الموظفين : أهلاً .. أهلاً يا مدير انت الأول والأخير..
مافي غير ك بنحب ولا غيرك بيصير مدير ..
أهلاً بالمدير العام .. يا علم فوق الأعلام ..
انت الكفاءة والجد ...
وانت اصل الاحترام ...
جمعة يرد عليهم : يا موظفين .. يا حلوين
خليكوا دايماً .. ساكتين
وطول مانتوا في الشغل ..
خليكوا على طول نايمين ..
***( ضحك هرج ومرح )
جمعة : شكراً .. شكراً .. تفضلوا
***( يجلسون على المقاعد )
يبادر أبو إسماعيل : لو تسمح لي يا استاذ باسم الموظفين جميعاً ، الى اجو يباركو يهنوا ، بقول انه احنا جميعنا تحت تصرف حضرتك ، وفي الخدمة ، واحنا مش قادرين نعبر او نوصف مدى فرحتنا ، وياريت لو تتكرم حضرتك وترفع للمسؤولين ، وتقول بالنيابه عنا جميعاً ، عن تقديرنا للقرار الشجاع والحكيم ، بتعيين حضرتكم .. هذا القرار ( كأنه يخطب) الذي يؤكد سياسة تعين الرجل المناسب في المكان المناسب والذي يفتح الباب واسعاً ( يؤكد واسعاً) امام تطور المؤسسة ورفعتها .. والى الامام سيروا فعين الله ترعاكم .
***( تصفيق حاد من قبل الجميع )
ابو اسماعيل : وبالمناسبة ياريت يا استاذ تتفضل بالحكي
جمعة ( مأخوذاً) : انا احكي ؟ ايش اقول ؟
ابو عدنان ( يتدخل ): قبل ما الاستاذ يتفضل بالحكي ، ياريت اذا حدا من الاخوان حابب يقول اشي ؟
***(على الفور يبدي احد الموظفين رغبته في ذلك )
: لو سمحتوا لي ؟ يهدءون
جمعة : مين حضرة الأخ ؟
الموظف : انا رامي مدير المشروعات
جمعة ( باستخفاف ) : انت مدير ؟ مدير ايش ؟ C برضه ؟
الموظف : صارلي ست شهرمدير C والاستاذ ابو اسماعيل مارضيش يرفع اسمي بقوائم الترقيات آخر السنة
جمعة : طيب بنشوف ، يعني حسب نشاطك ايش مدير مشروعات ؟ لما نشوف أخر مشاريعك ؟
***(يبدأ جمعة بالقاء كلمة) :
بسم الله الرحمن الرحيم ، اعزائي احبائي واخواني والصحيح الصحيح والغلط محدش برضى عليه ( ثم يتابع ) أنا الصحيح اليوم شربت احلى كباية شاي معاكم ، والصبح اشتريت فول وفلافل من عند ابو طلال بثلاثة شيكل ، وضليت الغ فيهم لما يعني عبيت الطاسة ، وصارت امور المؤسسة مفولة .. أنا مبسوط اني صرت واحد منكو.. ولا يهمكوا .. والله لأضل وراكوا لما تصيروا كلكوا مدرا ان شاء الله .. ان شاء الله ..ان شاء الله آه .. آه والسلام عليكم ورحمة الله وبركاته
( تصفيق حاد )
: يحيا العدل ، يعيش الاستاذ جمعة نصير الموظفين
***(يتقدم منه حامد ويبلغه خبراً ، يصفق بيديه ، فينتبه الجميع )
جمعه : أشكركوا فرداً فرداً وعن ازنكو اسمحولي جايني ضيوف
ابو عدنان : اذنك معك يا استاذ ، نورتنا
***( يغادر جمعة الى مكتبه ، ثم يجلس على كرسيه ويرفع الانتركوم ، يسأل سوزان )
جمعة : مين ؟ مندوب البنك ؟ خليه يتفضل
آه اكيد عشان القرض الى قدمنت عليه
***( يدخل الضيف فيفاجأ جمعة انه اجنبي ، فيهز رأسه ويطلب منه الجلوس ، ثم يرن الجرس يطلب من السكرتيرة ارسال المترجم خالد ، والى ان يحضر خالد يظل جمعة يهز برأسه ويقول (yes )( no) ستاند اب ، سد داون ، قد مورننق بويز ، قد مورننينق جيرز
: بين وقت والتاني الواحد لازم يراجع لغته هي لنجليزي اللي تعلمناه في سادس نفع
يدخل خالد ، يبادر بالتحية ، ويحي الضيف : ويل كم .. ول كام اهلاً وسهلاً
خالد يقدم جمعة للضيف : السيد جمعة ، رجل عصامي ، متفاني في العمل ، محبوب ، كفاءة مشهود الها ، عملي جداً
***( اعادة هذا المشهد " مشهد الاجنبي" وكأن المدير العام السابق كان قد قدم على قرض بقيمة 70 مليون دولار وفي نفس الوقت جمعة مقدم على قرض بقيمة 70 مليون اغورة ومن هنا تبدأ ملابسات المشهد )
يتدخل جمعة : ولكم .. ولكم .. في مكتبنا .. ويلكم ويلكم
***( يترجم خالد ويقدم الضيف وحين يلفظ اسم اورينت )
جمعة : آه اورينت .. الاورينت هاوس ؟ آه عرفت د
الضيف : نو .. نو اورينت هاوس فور يو !
جمعة : صار الي والله مانا عارف ، طيب ايش عليه صار ، عندي بنك ؟ ما علينا نخش في الموضوع ***( الضيف يسأ عن احتياجاتهم )
يترجم خالد
جمعه ( يهز رأسه ) : اول اشي واهم اشي بدي قرض ، مش انتو البنك ؟
يترجم خالد والضيف يوافق ويسأل عن كيفية دفع المبلغ
جمعة : بدي السبعين مليون كاش واليوم قبل بكرة ، يعني اذا ما فيها تقله
***( يترجم خالد ، يسأل الضيف عن موجبات القرض )
جمعة ( ضاحكاً) : عشر أضعاف الراتب ، ما انا عارف القوانين ، بطلعوا 70 مليون ، اذا بدكوا تحسبوا ع راتبي الجديد بطلعلي هبرة حرزانه
***( يترجم خالد ويسأل الضيف عن طبيعة المشروع )
ويترجم خالد
جمعة : آه فهمت عليك ، الصحيح ولا مؤاخذة بدي اسقف الأوضة
***( ويضيف موجهاً كلامه الى خالد )
: وضح له ، صارلي 30 سنة من القرميد ، كل شتا بتهر علينا الميه ، تقول بحر ، وانا صرت موظف والناس بتتطلع لي ، والشتا جاي والاولاد بدها تقرا ، بركي بنخلص من الدلف والمزراب
***( يترجم خالد ، فيسأل الضيف ان كان ينوي اقامة فندق خاص او بيت للضيافة )
جمعة : يا عمي فهمه أي فندق هادا محل الاقامة في المعسكر ، أسأله بدو كفلا ، ناديلك 2 موظفين
***( يترجم خالد ، ينتبه الضيف الى ان هناك خطأ )
يقول : نو .. نو .. 70 مليون دولار ، مستحيل عشان منزل خاص .
جمعة يسمع كلمة دولار فيقول ( قبل ان يترجم خالد )
: حدا جاب سيرة الدولار ؟ نو .. اغورة .. اسرائيلي .
***( يترجم خالد ويضحك الضيف، ثم يسأل كم يساوي المبلغ بالدولار )
خالد يقول : 1700 دولار
جمعة : اسمع يا خالد اذا هو مصر على دولار يدفع زي ما بدو
خالد : هو بيقول انهم بيمولو مشاريع عامة
جمعه : ما فيش مانع ، احنا 3 مليون يعني 300 الف عيلة ، كل عيلة 1700 دولار ، يعني حسابي ويحول الباقي للناس على مهلة ..
وبالطريقة اللي بتعجبه ، وبعدين انا مدير عام مش مدير خاص .. ترجمله
ثم يسأل انادى الكفلا؟
بترجم خالد بتحدث الضيف عن انه سينقل الصورة الى مسؤولى المصرف الدولى وسيوصى بصرف المبلغ من اجل السكان الفلسطينيين وسيخبرهم بالنتائج لا حقا
جمعة :يعنى ضيعنا وقتناع الماضى يا الله يا با الزيارة انتهت ويل كم .........ول عليكو ول عملتو ا البحر مقاتى .. سى يو تومورو ؟
ينهض الضيف يمد جمعة يده قائلا
:سلم لى على شومان ووصيهم علينا بلكى اخذنا القرض وسقفنا الاوضة .
يخرج الضيف ومعه خالد السكرتيرة تفتح عليه الهاتف الداخلى
:استاذ ما تنساش حفلة اليوم ولا الكلمة اللى حضرتك لا زم تلقيها على الحضور.
جمعة : مفهوم ..مفهوم فى اشى كمان .
السكرتيرة : بعدين الاستاذ ابو زياد فى المستشفى لازم تعمله زيارة .
جمعة : مين هادا ابو زياد ؟
السكرتيرة : عضو مجلس ادارة المؤ سسة .
جمعة : اه يعنى مهم وين هو ..فى الشفا؟
السكرتيرة : لأ فى المقاصد
جمعة : المقاصد ؟ايش هادى مستشفى ؟
السكرتيرة : اه مستشفى فى القدس
جمعة : وايش بدو يوصنا للقدس بالك بعملولي تصريح ، والا بيعتبروني شخص مهم؟
السكرتيرة : إحنا بنكلف المكتب هناك ، يبعث له ورد باسمك وأنت من هان بتعمله الو...
جمعة : وبنزل في الجريدة اعلان .. اكتبي عندك .. الأخ ابو زياد .. نتمنى لك الشفاء العاجل ، حتى تعود لبيتك واولادك زي الحصان والله من وراء القصد .. جمعة ابن خميس .. اوعي تنسي تكتبي اسمي بالبنط العريض اهم اشي يكون اسمي مكتوب .. ها
السكرتيرة : حاضر يا استاذ
***( جمعة يدير قرص الهاتف )
: الو صباح الخير .. كيف حالك يا انسة .. صوتك حلو .. اكيد انت حلوة كمان .. أنا .. أنا الاستاذ جمعة .. مين بدي ..المراسل ..لأ..لأ المدير العام
***( ينتظر قليلاً ثم يسمع صوت موسيقى عبر الخط يبدأ يحرك جسده ، كأنه يرقص ثم تتغير الموسيقى الى وحدة نص )
: يا عيني على ها الموسيقى ، والله الواحد يضل فاتح الخط ، وكأنه فاتح راديو
***( يتغير صوت الموسيقى فينتصب ثم يتحدث
: الو .. أهلاً يا زميل ، أبدا فيش اشي بس حبينا نتصل يعني عشان لازم يكون في اتصالات بين المؤسسات التي بتشتغل زي بعض ، والمسؤولين اللي على المستوى ، لازم يحكوا مع بعض ، مش هيك .. أهلاً وسهلاً ، وانا جمعة الهيبان .. الله يزيدك شرف ، طب يا ريت تشرفنا حضرتك ع الحفلة اليوم ، انتو عاملين حفلة .. طيب يا سيدي خيرها في غيرها ، والله يديم الأفراح ، وان شالله يجمعنا عند قبر النبي .. آمين يا رب
***( ويغلق الخط ، فيما السكرتيرة تفتح عليه الخط الداخلي مجدداً)
: استاذ جمعه ، الجماعة جاهزين ، وبستنوا حضرتك
جمعة : وانت جاهزة
السكرتيرة ( باستنكار): نعم ؟
جمعه : ليش بتفهميني غلط يا ست سوزان ؟ قصدي عشان ترافقيني ع الحفلة
السكرتيرة : نعم الكل جاهز
جمعة : يالله على بركة الله
***( يخرجان باتجاه القاعة حيث تبدأ الحفلة ، وتظهر الملصقات ولوازم الضيافة ، يدخل القاعة ، فيرافقه التصويت ، يوجد على الطاولة مشروبات غازية وبسكويت ، بمجرد دخوله يصب كولا ويبدأ بأكل البسكويت بشكل مضحك )
عريف الحفل: انه ليوم مجيد ، أن يحتفل معنا السيد المدير العام ، الذي يدلل وجوده معنا على مدى ما يكنه من احترام وتقدير للمرأة ، نصف المجتمع التي تتمتع بكل الحقوق الوطنية .. ونحن نقول بكل وضوح وصرامة بأننا سنستمر في مناصرة المرأة الى ان تختفي الفوارق في المجتمع ونقول بأنه لو كانت في منصب المدير العام امرأه لما كانت نصيرة لها ، مثلما هو مديرنا العام ..
***( يواصل التصفيق )
عريف الحفل : وانه ليشرفنا ان نطلب باسمكم جميعاً من المدير العام ، التكرم بالقاء كلمته التاريخية في هذه المناسبة ..
جمعه ( مرتبكأً ثم مشجعاً ) : اشي منيح يكون للنسوان يوم ، بس بقية السنة لمين ؟ المهم نكون كلنا ايد وحده عشان نربي الاولاد ، طيب علي ( الطلا..) – يتراجع - من غير يمين ، انه النسوان الله يعينهم كل سنه حبل وميلاد وطول اليوم طبيخ وجلي ومسح وكنس .. وهس ولك .. اسكتي .. حاضر طيب .. والسلام عليكم ورحمة الله وبركاته
تصفيق :
يوشوش له عريف الحفل:
نعم .. يالله تفضلوا ع البوفيه
***( تخفت الاضاءة ، وتتحرك الموسيقى هادئة ، ثم يبدأ الجدميع في الأكل والشرب ، وبعضهم في الحديث ، تتقدم منه صبيه ، تسلم عليه )
جمعة : اهلاً .. اهلاً..
البنت : انا جيت ع المعاد
جمعة : معاد أي معاد
البنت : مش اليوم معادنا .. انا فدوى
جمعه : آه فدوى
***( ثم يتناول عصيراً )
: تفضلي يا انسه .. الصحيح مبين عليك يا فدوى .. كلك مؤهلات ( ويتفحص جسدها ويتابع : خلص اعتبري حالك معينه من اليوم
فدوى : وايش الوظيفة
جمعة : زي ما بدك المهم خليك قريبة مني
***( في تلك اللحظة تحضر امرأة عندما يراها ، يحاول ان يخرج من القاعة ، فتمسك بكتفه )
بهيجة : وين رايح ، وايش بتسوي هان ؟
جمعه : هس .. هس .. خذي كولا وبتي فور كليهم ، والله اسمعي ، خلي الولد يجيبلك كيس بتي فور تروحي فيه للاولاد ..
بهيجة : يعني مش شايفاك بدور على الموظفين بصينينية الشاي والقهوة
جمعة : اسمعي يامرة انا زلمة مهم ، وغيرت جلدي ، تخلنيش انسى العيش والملح واغيرك كمان
***( تبتسم له فدوى ، التي تبدو قريبة منه لكنها لا تسمع ما يدور بينه وبين زوجته )
بهيجة : طيب .. طيب .. اليوم شفت ابوك في السوق ، وقال انهم جايين لعنا ، قلت اجي لك تعطيني متين الف اشتري طبخة للضيوف .
***( يمد يده في جيبه ويخرج ورقة نقديه )
جمعة : خدي هي نص مليون بحاله ، بس انت توكلي هان شغل يا بنت الحلال .
***( سوزان تراه فتعتقد بأنه يمنح صدقة لطالبتها فتبتسم )
جمعة ينادي : حامد .. حامد .. ولد يا حامد
حامد : نعم يا استاذ
يؤشر جمعة على بهيجة : شوف الست عبيلها كيس بتي فور حرام ، ولادها بستنوها ، طول عمرهم ما شافوه ، انا بعرف حالتهم منيح .. خليها تدعيلنا .
***( ثم يخرج من القاعة وصت احتفال الجميع )
***
***(جمعة في مكتبه وقد انتهت الحفلة ، بعد قليل يحضر المدير العام السابق ، يحمل سيجارة ، ويدخل على السكرتيرة التي تفاجأ به ، حيث لم تعمل حساباً لحضوره )
ابو ماضي : صباح الخير
سوزان : نعم يا استاذ
***( لا يعيرها انتباهاً ويدخل ، يتوجه الى مكتبه ، فيفاجأ بجمعة )
ابو ماضي : جمعة ، ايش بتسوي ، لساتك بتنظف ؟
***( جمعة الذي كان مشغولاً باللعب في جهاز الكمبيوتر )
ابو ماضي : جمعة ، ايش بتسوي ، لساتك بتنظف ؟
: نعم ؟ ايش الحفلة خلصت ؟ على العموم حضرتك ، كنت مدعو وتأخرت ؟ مش مشكله ،
تفضل .. تفضل ..
ابو ماضي : حفلة ايش ؟ ومدعو مين ؟ مالك يا جمعة أنت نسيت حالك ، ، وأنت تنظف والا ايش ؟
جمعة : بنظف .. ايش بنظف .. آه بنظف كل اشي اصل الاستاذ الله يسهل عليه كان ..
يقاطعه : ايش بتقول ؟ يالله كباية القهوة المزبوطة بسرعة
جمعة : وينها كباية القهوة ؟ يعني شكلك مش ..
ابو ماضي : ايش صارلك يا جمعة .. قوم شوف شغلك ..
جمعه ( يعرفه لكنه يتجاهله ): يا حضرة .. مانا شايف شغلي ، والله كنت مستني واحد زيك ، يوريني اياه يعني ؟
ابو ماضي ( يتراجع ) : انت مين ؟ مش جمعة المراسل ؟
جمعة : انا جمعة .. نعم .. انا جمعة .. بس انا المدير العام .. بس انت مين حضرتك ؟
ابو ماضي ( غاضباً) : انا ، وبتسألني مين انا ، ولك انا المدير العام ، ايش صايرلك ؟ ايش صاير في المؤسسة ؟ قوم فز من مطرحك .
جمعة : اسمع ، اوعك تغلط ها ، انا هان المدير العام ، فش مدير عام غيري .. بعدين انت كيف بتدخل هيك من غير احم ولا دستور ؟
ابو ماضي : احم ايش ودستور ايش ؟ ايش الدعوة يومين وطارت عقول الناس ؟
***( ثم يقترب من جمعة ويبدوا اهدأ )
: جمعة ..انا ابو ماضي ، الاستاذ ، ايش صارلك ايش فيه ؟
جمعه ( هادئاً) : آه انا بشبه عليك ، كان في عنا واحد موظف بيشبهك ، بس هادا كان زمان .
ابو ماضي( منفعلاً): موظف وكان زمان ؟ يا زلمة كلها يومين وانا المدير العام .
جمعة( مستنكراً) : ما تقولش المدير العام ، لأنه ماي مدير عام غيري ، مافي مدير عام وانا موجود
ابو ماضي : وبعدين في هالمسرحية .. ايش يا جمعة انت مفكر اليوم عطلة يالله ما هما اهلك سموك جمعة .. عشان جيت .. اكيد في يوم عطله
جمعة : ماله يوم الجمعة وماله اسم جمعة .. الناس بتتريح فيه وبتنبسط كمان
ابو ماضي : بس يوم العطله ، يوم عابر يوم مؤقت ، يوم يلعب ، مش يوم جد .. وهالقيت خلينا من اللعب وخلينا نرجع عالجد
جمعة: وايش الجد ..انك تستغرب اني اكون مدير عام ؟ هاد الجد ؟ وانك انت بس الي بطلعلك .. هادا هو الجد .. اللي الك مصلحة فيه هو هادا الجد واللي ملكاش لعب .. يا سيدي ما احلاه اللعب وياريت كل حياتنا مسرح في مسرح .. وقال يعني الي احنا فيه مش زي المسرح ..بس بعدين يا سيدي يومين ولا ساعتين .. ليش مستقل فيهم يعني .. ما الدنيا بتصير الفوقاني تحتاني في يومين ؟ انت بتسمعش الأخبار واللا ايش ؟ في لحظة بتقوم حرب وزلزال وانقلابات
ابو ماضي : آه .. فهمت يعني عاملين انقلاب يعني ؟
جمعة : انا بقول ثورة
ابو ماضي : بلا طول حكي .. ثورة ولا انقلاب .. المهم انا شايف انك زودتها ، قوم خليني اشوف ، شغلي واقعد على مكتبي
جمعة : قصدك .. وقصدك .. هدولة هبل وعلى نياتهم لا يابا يفتح الله احنا هان غير شكل ، احنا بنقعد ومن هان للقبر ..
ابو ماضي : يعني مافي حل ؟
جمعة: لا ..فيه
ابو ماضي : ايش ؟
جمعة : استنى
***( ويضرب الجرس )
ابو ماضي : ابو اسماعيل ابعتلي كل الموظين ، وتعال معهم انت كمان حالاً..
ويتابع : انت تفضل اجلس هان ع الكنبة وشوف بعينك
***( يدخل الموظفون يلقون التحية ويتجاهلون مديرهم السابق )
جمعة : اتفضلوا كل واحد في مطرحه المخصص اله ..( يتوقف ) _ ثم يقول – في واحد منكم بيعرف الآخ ؟
ابو عدنان : الاخ ابو ماضي ( يتهلل وجه ابو ماضي ) كيف ما بنعرفه ؟
جمعه : نعم .. نعم .. هو ابو ماضي ، ايش بتعرف عنه يابو عدنان ؟
ابو عدنان : كان مديرنا قبل يعني ماتصير حضرتك المدير
جمعة : بالزبط هادا الكلام الصحيح .. وانا بقول يعني انه ما بصير نتخلى عنه ، ولازم نقوم ابه ، واذا لسه بحب يضله معانا احنا لازم نشوفله شغله . وانا عشان الاصول والواجب ، راح اوقع قرار ، حالاً بتعينه مدير قسم التقاعد
ابو ماضي ( محتجاً) : ايش مدير قسم من مدير عام المؤسسة لمدير قسم فيها ؟
جمعة : يا سيدي ولا تزعل مدير عام في المؤسسة
ابو ماضي : يا زلمة انا كفاءة ومؤهل وخبرة
جمعة : بعرف ، والله بتستحق تكون مدير عام الكرة الارضية ، بس بدك شاغر ، ايش رأيك تستنىلما يصير مدير عام المؤسسة شاغر ؟ والا اقولك تاخذها من قصيرها وتشتغل مراسل وتستناني لما اسافر بمهمة ( يضحك ) واذا بدك بوديك على مؤسسة ثانية ، وتعمل زي مانا عملت وتاخذها بدراعك ؟
***( ابو ماضي مستغرباً)
جمعة : خلص انتهى النقاش ، وانتوا( مشيراً على الموظفين ) تفضلوا على مكاتبكوا
***(يخرج الموظفون)
ابو ماضي : اسمع ما تفكرش انك بتقدر تهيلم علي ، والله بوصلها لأعلى المسؤولين ، وبفضح الدنيا ، انت خليك مدير عام ، بس انا برضه مدير عام
جمعة : والكتب؟ والصلاحيات؟
ابو ماضي : بنقسم كل اشي
جمعة : كيف؟
***(ابو ماضي يجر كرسياً ويضعه خلف المكتب، ويقسم المكتب الى قسمين )
ابو ماضي : هيك انا هان وانت هان
***(يرن جرس الهاتف فيتنازعان المكالمة)
ابو ماضي : مين بدك ، المدير العام ، انا المدير العام
جمعة يخطف السماعة : انا المدير العام ، نعم بخصوص مشروع الاسكان ؟
ابو ماضي يأخذ السماعة : ايش في مشروع الاسكان العمل متوقف ؟
جمعة يأخذ السماعة : طيب خلي العمال ياخذوا استراحة ايش بتقول مخاسر وتفتيش ؟
يعطي السماعة لأبو ماضي : ايش لجنة
***(يعطيها لجمعة ، ثم يرفضان كلاهما متابعة المكالمة ، ثم يجلسان على كرسيهما يتزاحمان )
جمعة : اسمع هيك ما بزبط معنا ايش رايك نقسم هيك ..
***( وينقل كرسيه الى الجهة المقابلة ، يجلسان مقابل بعضهما ، ويضعان فاصلاً ( خيطاً بينهما))
ابو ماضي : تمام
نادية ( مستغربة ): هادا قراركو ؟
ابو ماضي وجمعة : بالاجماع
***( يرفعان ايديهما ، بينما تنتقل الاضاءة لأبو اسماعيل وابو عدنان ، تصلهما نادية وفي يدها الملف ، نادية شفتوا الاخوان ايش قرروا ، ابو عدنان وابو اسماعيل ينظران في الملف تظهر عليهما علامات الاستغراب
ابو عدنان : لأهيك المسأله زادت عن حدها احنا كنا في واحد صرنا في اثنين
ابو اسماعيل : الامور صارت شوربة ، المشاريع ، القرارات ، الاجراءات ..
نادية : اذا البرلمان بتصله هالتوصية بتقوم الدنيا وما بتقعد ، وبتصير فضيحة في كل البلد
ابو اسماعيل : انا رأي نبعث التوصية ، وخليها توصل لحد ما توصل ، ما هي اذا ما اشتدتش ما بتفرج.
ابو عدنان : يا ناس مالكو .. هادي المؤسسة النا .. ولازم احنا ندخل وندافع عنها
ابو اسماعيل : ايش يعني رايك نسوي مظاهرة ولا ثورة ؟
نادية : يعني هو يا هيك .. يا هيك .. مخصناش يا بنولعها ؟
ابو عدنان ( مفكراً) : ليش ما نبعث خبر للمجلس الاعلى ؟
نادية : ومين بدوا يخاطبه غير المدير العام ؟ قصدي اثنين مدير عام !
ابو اسماعيل : آه كيف بدنا نتجاوز التسلسل الوظيفي ؟
كيف
ابو عدنان : ابداً ، لازم نتحمل المسؤولية ، ونطلب رقابة علينا !
***

ابو ماضي وجمعة متقابلان
ابو ماضي : اسمع لما بصلك بريد بتمررلي اياه
جمعة : وانت كمان
ابو ماضي : وقبل ما تبعته ، بتمرره على الجهاز الامني
جمعة : والحواجز ماتنساش الله يخليك
ابو ماضي : لازم ما تنسى انه انا وياك صرنا الحال من بعضه
جمعة : انا وياك واحد
***( ثم ضاحكاً)
جمعة : تيجي نقسم القمر
ابو ماضي : انا نص وانت نص
: اهلاأ جمعة نص مدير عام
: اهلاً جمعة النص الثاني
جمعة : ايش رايك يا صاحبي انا مش عاجبني قصة مدير عام مؤسسة
ابو ماضي : ايش الي مش عاجبك في الموضوع؟
جمعة : يعني عام وعامة ، يازلمة بدنا اشي خاص
ابو ماضي : آه يا ملعون فهمت عليك
جمعة : يعني لو قلنا مدير خاص للمؤسسة العامة ، بنختلف عن الناس لأنه الشغلة مالها طعمة هيك
ابو ماضي : والامدير عام المؤسسة خاصة
جمعة : يعني رأيك انه احسن ، خاص والاخاصة ؟
ابو ماضي : يا زلمة سيبك من الشكليات وفكر في المصلحة الخاصة
جمعة : كيف ؟
ابو ماضي : هات نشوفلنا طريقة نرتب فيها بربوزل
جمعة : يعني ان جي اوز ؟
ابو ماضي : اشي زي هيك ، وبدل ماحنا متقاتلين على اشي مش حرزان ، خلينا نتفق على الاشي الحرزان
***( يرن جرس السكرتيرة على الخط )
سوزان : الاستاذ ابو زياد وصل
جمعة : مين ابو زياد ؟
السكرتيرة : عضو المجلس الاعلى
جمعة مرتبكاً: ايش ؟
***( ويعطي السماعة لأبو ماضي)
ابو ماضي : خليه يتفضل
يدخل الرجل ويسلم ويسأل : مين المدير العام ؟
***( جمعة متردداً وابو ماضي متردداً)
ابو زياد : مين فيكو؟
كلاهما : احنا المدير العام
ابو زياد ( متعجباً) : هيك مع بعض ؟
***( ويتفحص الاوراق ثم يسأل )
: مين ابو ماضي مين جمعة ؟
ولا ينتظر الرد
: في عنا مخاطبات بتوقيع جمعة ومخاطبات بتوقيع ابو ماضي .
***( وكأنه مستغرباً للفكرة )
: وكيف الشغل ماشي ؟
جمعة : احنا بنحاول نعمل شغل
ابو ماضي : وبعدين بنفكر كيف نمشيه
ابو زياد : وكيف انتو شاغالين مع بعض
جمعة : على بركة الله ، على فيض الكريم
ابو ماضي : سيري فعين الله ترعاك
***( يجلس ابو زياد ثم كأنه يقرأ )
: التقارير بتقول انه الوضع مزري والمشاكل متفاقمة ، وعشان هيك المجلس الاعلى أخذ قرار بوضع المؤسسة تحت الوصايه
ابو ماضي وجمعة معاً: ايش يعني
ابو زياد : يعني انا بدى اظل معكو هان في المؤسسة ، اتابع العمل بنفسي
كلاهما معاً : ابداً، أهلاً وسهلاً ، بنقسم المكتب ع ثلاثة .
ابو زياد ( محتداً) : ايش بتقولوا، انتوا مجانين ، ايش بنقسم ما بنقسم ، عمركو شفتوا سيارة سايقها اثنين والا ثلاثة ؟ وبعدين هو الموضوع ، موضوعه وجاهة والا مسؤولية ؟ وبعدين مين قال المدير العام اهم من المراسل ؟ المهم كل واحد يقوم بعمله ، كما يجب ، والمراسل القايم بشغله احسن من المدير العام اللي مش قايم بواجبه ، انت مدير عام ، وهو مدير عام وهي مدير عام وكل واحد بده مدير عام ، ليش يعني ؟ والمؤسسة هادي مش مؤسستكو ، مش بتعيشوا انتو وولادكو وعيالكوا من وراها ، ولازم تحافظوا عليها ؟
جمعة : يا سيد ابو زياد ( بأدب ) يعني هو انا بعرف اكون مدير عام ، والا كان في بالي ، ما انا طول عمري مراسل ، بعمل الشاي والقهوة ، زي الفنينة ، وبقول موظف وحامد كريم ، بس الشغلة صارت زي اللعبة
ابو زياد : لعبة .. آه لعبة .. لعبة والنتيجة ؟ لازم كلنا نحس بالمسؤولية ، كل واحد في مطرحو بيسوى وفي غير مطرحه بهدله ، مش بس اله ، وللناس والمؤسسات كمان ، تعالوا حطوا ايدكو في ايدين بعض مدراء وموظفين ومراسلين ، عشان حالنا كلنا يتعدل ويصير منيح ، وعشان نطمن على اولادنا ، يعيشوا احسن من ما عشنا
جمعة ثم ابو ماضي : يالله ، لعيونك يا ابو زياد
***( ثم بقية الموظفين جميعاًويضعٍ


بقلم رجب أبو سرية

[نبيذومطر]

رد: مسرحية السيد المدير العام

يسلم ايديك عالنقل .. بس ليش ما عملتها مثل سلسلة ؟

بكل الأحوال يعطيك العافية

[Dodi]

رد: مسرحية السيد المدير العام

ميرسي

[anis]

رد: مسرحية السيد المدير العام

[حنا80]

رد: مسرحية السيد المدير العام

شو طويله هلكنا
خيو عملها اجزاء